O primeiro número de Matin Plus, do que se tiraron 350.000 exemplares e foi distribuído por 350 repartidores colocados preto de puntos de paso estratéxicos como estacións de transportes públicos, constaba de 30 páxinas con moita cor e a portada ocupábaa unha imaxe do presidente francés co título 'Chirac, a hora das decisións'.

O novo diario, no que Bolloré ten o 70% e Le Monde o 30% restante, pretende distinguirse dos outros dous competidores do mercado da prensa gratuíta na capital francesa, Metro e 20 minutes, polas achegas editoriais da súa casa matriz.

En efecto, o semanario Courrier International achega catro páxinas á nova cabeceira, que funciona cun cadro dunha vintena longa de persoas dirixidos por un xornalista tamén de Le Monde, François Bonnet.

Bolloré, que xa lanzou en solitario un gratuíto en París, pero que se distribúe desde media tarde, Direct Soir, ten previsto investir máis de 50 millóns de euros neste novo proxecto, dos cales unha vintena este primeiro ano.

O empresario Vincent Bolloré é quen controla tanto a distribución como a publicidade do novo diario, xa que é o único que arrisca de entrada diñeiro, posto que Le Monde non podía facelo e quedou limitado á súa achega editorial, ó que se engade un contrato para a impresión nas súas rotativas, que algunhas fontes citadas pola prensa avalían en 3,8 millóns de euros.

Rendibilidade incerta

Matin Plus será a cabeza de ponte dunha rede de gratuítos, Ville Plus que xa está presente noutras cinco cidades francesas (Lión, Marsella, Lille, Montpellier e Bordeos) que representan unha tiraxe de 590.000 exemplares diarios.

Entra nun mercado cunha rendibilidade incerta: a edición francesa de Metro obtivo 300.000 euros de beneficios no 2005 e espérase un resultado tamén positivo no exercicio do 2006, mentres que 20 Minutes aínda non lograra equilibrar as súas contas o ano pasado, aínda que se achegaba.

MADRID / PARÍAS
ESTRELLA DIGITAL / EFE